Вакыты чыккан машина йөртү таныклыгы өчен 15 мең сумга кадәр штраф каралган
Россиядә гамәлдә булу вакыты чыккан машина йөртү таныклыгы белән автомобиль йөртү хокуксыз идарә итүгә тиңләштерелә.
Бу хакта Россия Эчке эшләр министрлыгында искә төшерделәр.
Хокук бозучыга 5 меңнән 15 мең сумга кадәр административ штраф яный. Моннан тыш, автомобиль махсуслаштырылган стоянкага урнаштырылырга, ә йөртүче транспорт чарасы белән идарә итүдән читләштерелергә мөмкин.
Шул ук вакытта мөһим нечкәлек бар: таныклыкның гамәлдә булу вакыты чыкканнан соң гражданин автомобиль белән идарә итмәгән икән, ул җаваплылыкка тартылмый.
Вакыты чыккан таныклыкны ничек алыштырырга?
Элек бирелгән машина йөртү таныклыгын яңадан рәсмиләштергәндә имтихан тапшырырга кирәкми. Моның өчен паспорт, булган очракта — иске таныклык һәм транспорт чарасы белән идарә итүгә медицина ягыннан каршы күрсәтмәләр булмавын раслаучы медицина бәяләмәсе кирәк.
Моннан тыш, Россиядә кайбер машина йөртү таныклыкларының гамәлдә булу вакыты озайтылды.
2022 елның 1 гыйнварыннан 2025 елның 31 декабренә кадәр гамәлдә булган Россия милли машина йөртү таныклыклары өч елга автомат рәвештә озайтылды. Моның өчен Дәүләт автоинспекциясенә махсус мөрәҗәгать итү таләп ителми.
